Վրաստանում Եվրամիության դեսպան Պավել Գերչինսկին «հիասթափեցնող» է անվանել այն գործընթացը, ինչի պատճառով Վրաստանի մուտքը Եվրամիություն գործնականում սառեցված է։

Նրա խոսքով, որը մեջբերում է «Эхо Кавказа»-ն, Վրաստանում «օտարերկրյա գործակալների» մասին օրենքի ընդունումից հետո պատասխան միջոցների թեման կքննարկվի հաջորդ շաբաթ Լյուքսեմբուրգում ԵՄ ԱԳ նախարարների մակարդակով. «Ներկայումս Վրաստանի և Եվրամիության միջև հարաբերություններում շատ բարդ ժամանակաշրջան է, մենք բազմիցս կրկնել ենք, որ «Օտարերկրյա ազդեցության թափանցիկության մասին» օրենքը բացասաբար կանդրադառնա Վրաստանի եվրաինտեգրման ձգտումների վրա։ Ցավոք սրտի, դա տեղի ունեցավ»:

«Այդ օրենքի ընդունումը բացասական ազդեցություն է ունեցել և, իմ կարծիքով, սառեցրել է Վրաստանի եվրաինտեգրումը, քանի որ, ինչպես հայտնի է, Եվրամիությանն ինտեգրվելը պահանջում է միաձայնություն, իսկ դուք բոլորդ արդեն լսել եք մի քանի անդամ պետությունների հրապարակային հայտարարություններն առ այն, որ նրանք չեն սկսի բանակցություններ Վրաստանի մուտքի շուրջ, եթե այդ օրենքը մնա ուժի մեջ»,- ասել է Գերչինսկին:

Դեսպանն ընդգծել է, որ «դա տեղի է ունենում Ուկրաինայի և Մոլդովայի անդամակցության շուրջ բանակցությունների մեկնարկի ֆոնին»։